10 Tochtli {1398}. 11 Acatl. 12 Tecpatl. 13 Calli.

Ce Tochtli {1402}. Ome Acatl, oncan molpi in Xihuitl ihuan oncan temoque chachapoltin. 3 tecpatl. 4 calli. 5 Tochtli. 6 acatl, 7 tecpatl, 8 calli, 9 tochtli, 10 acatl, 11 tecpatl, 12 calli, 13 tochtli.

Ce acatl. 2 tecpatl {1415}, 3 calli {1417}, in ipan miquico Huitzilihuitzin. Auh zan niman icon motlatocatlali in Chimalpopoca. 4 tochtli, 5 Acatl, 6 tecpatl, 7 calli, 8 tochtli, 9 acatl, 10 tecpatl, 11 calli, ipan in moman temalacatl in tlalcocomoco. 12 tochtli, 13 acatl {1427}, in ipan momiquili Chimalpopoca. Auh in oyuh on momiquili niman ic omotlatocatlali in Itzcohuatzin. Auh ipan mochiuh in Tlatilolco Temoc chimalli qui cahuaco in Mexico, auh niman quichiuhque centetl zan noyuhque.

Ce tecpatl {1428} Xihuitl, in ipan quihualtzacque Quauhnahuaca. ± 2 calli, Yn ipan poliuhque Atzcapotzalca, ihuan Tepaneca, Coyohuaque. 3 tochtli in ipan pehualloque Xochimilca. 4 acatl In ipan quipeuhque Tlatilolca. Iquac tlatocatia Quauhtlatoatzin in ipan ic ceppa pehualoque Tlatilolca. 5 tecpatl in ipan quinpeuhque Mizquic tlaca. 6 calli, In ipan poliuhque Cuitlahuaca. 7 tochtli. 8 acatl, 9 tecpatl, 10 calli, 11 tochtli, 12 acatl. In ipan poliuhque Quauhnahuaca in oquimonpeuhque. Ce Xihuitl in tequitlaque tlacalaque, in ichan Itzcohuatzin. 13 tecpatl, in ipan momiquilico Itzcohuatzin.

Ce {1443} Calli, in ipan motlatocatlalli in Huehue Moteuhzomatzin Ilhuicamina Quetzaltecolotl. 2 tochtli. 3 acatl. 4 tecpatl, 5 calli, 6 tochtli, ipan tlachapolqualoc temoque chapoltin iquac nomayanaloc. 7 acatl. 8 tecpatl. 9 calli. 10 tochtli. 11 acatl. 12 tecpatl. 13 calli.

Ce tochtli {1453}. Inipan mayanaloc ± necetochhuiloc ompatla olmamaloto Cuextlan. 2 acatl nican toxiuhmolpili. 3 tecpatl, 4 calli, 5 tochtli, Ipan quimaque temalacatl, no iquac tlalpoliuh Tepotzcololan tlacapehualoque. 6 acatl, 7 tecpatl, 8 calli, 9 tochtli, 10 acatl, 11 tecpatl, 12 calli. iquac poliuhque chalcâ, ihuan iquac motlalico Capoloac tlacâ. 13 tochtli.

Ce acatl {1467}, 2 tecpatl, iquac mítotique in tetepe matlatzinco. Auh iquac momiquilico in Huehue Moteuhzomatzin. Auh níman ic hualmotlali in Axayacatzin. 3 calli inipan motlatocatlali Axayacatzin. 4 tochtli iquac poliuhque Cuetlaxtecâ. 5 acatl ipan pehualoque Xochitlan tlaca. 6 tecpatl. 7 calli, in ipan pehualoque Chiapantlaca, noíquac poliuhque Tlatilolca amo huecauh in quimopeuh Axayacatzin; ca moquich nenequia in Moquihuix nehuan in teconal in tlacamopolihuizquia. ± 8 tochtli. 9 acatl in ipan quinpeuh Tolocan tlaca Matlatzinca, ihuan iquac tlallolin cenca totocac miec in tepetl Xixitin mochpapachiuh in calli : 10 tecpatl ipan poliuhque in Ocuilteca yaochontalcohuatlan tlacâ. 11 calli, nican poliuhque Ycpatepeca. 12 tochtli nican políuhque Calliymayan tlaca Matlatzinca. 13 acatl {1479} ipan poliuhque Xiquipilco tlaca, ihuan iquac qualoc tonatiuh mochnezque izcicitlaltin, auh zan no iquac quipeuhque Tochcalco tlaca.

Ce tecpatl {1480}. 2 calli, nican miquico in Axayacatzin. 3 tochtli ipan motlatocatlali in Tizocicatzin. 4 acatl ipan quitetzomanque in icalcatca Tlacatecolotl cozcaquauhtenanca Tlaollan tlaca inin ca momamal. 5 tecpatl. 6 calli. 7 tochtli, nican miquico in Tizocicatzin, auh niman ic ommotlalli in Ahuitzotzin. 8 acatl nican momamal in Teocalli in icalcatca Tlacatecolotl inin ca momamal Tziuhcohuaca mazateca, Tlâpantlaca. 9 tecpatl iquac quinpeuhque Tziuhcohuaca, ihuan Tetzapotitlan tlaca. ± 10 calli nican tlallolin, iquac ye no quipeuhque Tlapatzínca ihuan Totoltenancotlaca ihuan atlichayacantlaca in oxihuitl macuilcan intepeuh in Ahuitzotzin. Ihuac iquac monexti imoyohualitohuatzin. 11 tochtli nican teciuh mochmicque in mimichtín, ihuan in ixquichtin atlanchaneque. No iquac quipeuhque Quauhtepectlaca. 12 acatl. Nican tlachapolqualoc temoque chachapolme, ¾ ihuan iquac quimpeuhque iztactlaolan tlaca. 13 tecpatl {1490} nican cocolin qualoc iquac nomayanalloc ocno ompa tlaolmamaloto Cuextlan, ihuan iquac qualoc tonatiuh, auh iquac noquinpeuhque Acatlantlaca.

Ce calli {1493}, ipan quipeuhque Xicochimalco tlaca. 2 tochtli, ipan quimpeuhque Mizquitlan tlaca, ihuan Quapilolantlaca, ihuan Tzapotlantlaca. 3 Acatl, 4 tecpatl, nican tlallollin cenca totocac moch tzatzayan in tlalli. Iquac no quimpeuhque Nahuallantlaca. 5 calli nican poliuhque Xochitlantlaca, ihuan Amoxtlantlaca. 6 tochtli, nican poliuhque Chillantlaca. ± 7 acatl ipan quipeuhque Tequantepectlaca. 8 tecpatl nican huetzico in Acuecuexatl ínica pachiuh Mexico. 9 calli {1501} nican tetatacoto Malinalco in aquin amoya miec tlacatl quitzauctia mictilloc. 10 tochtli {1502} in ipan miquico in Ahuetzotzin.

Auh {1502} niman ic on motlalli in Moteuhzomatzin. 11 acatl {1503} in ipan occepa tetatacoto, auh no iquac quimpeuhque Yopiltzinca. 12 tecpatl {1504} iquac peuh in pochtecayotl, auh no iquac quinpeuhque Totolantlaca. 13 calli {1405} nican temoc Tzitzimitl, iquac pehualoque Pipiyolteca.

Ce tochtli {1506}, iquac poliuhque Zozolantlaca, ihuan Quetzaltenanca, ihuan Teuhtepeca. 2 acatl {1506}, nican molpi in Toxiuh ic chicopa molpia, in ixquichtica ompa huallaque Mexica. 3 tecpatl {1508}, nican temoque Tlacahuilome {palomatoxcaz}. 4 calli nican in hualmoquequetzaya tetzahuitl mixpanitl, ihuan iquac in temoc temimilli texihuacan. ± 5 tochtli {1510} ipan químpeuhque in Icpatepeca. 6 acatl {1511} ipan quimpeuhque Chichihualtatacalhan tlaca. 9 tochtli {1514} nican Teuhtlimoquetza yama yanaloc, ihuan iquac pehualoque Iztactlalocantla 10 acatl {1515} nican tetatacoto Zayyopa {la ultima vez}, 11 tecpatl {1416}. 12 calli {1417}. 13 tochtli {1518}, ipan totomonihuac.

Ce acatl {1519}, in ipan acico Españolesme Caxtilteca Marquez del Valle, ipan acico Moteuhzomatzin iquac tlatocati in nican Mexico, iniquac acico Caxtilteca, auh Xoloco , in quin a miquito Moteuhzomatzin Quetzalecacehuaztica inquicaltitiaque in Tlatoque Teteuctin Tequihuaque Pipiltin Teocuitlacozcatl, in conaquito, in ipan quimamícque in Marquez.

Auh in ipan acico in yuhqui Metztlapohualli Quecholli ± oquiuh matlaquilhuitl, tzonquizaz in Quecholli, niman ye Panquetzaliztli, Atemoztli, Tititl, Izcalli, Quahuitlehua, Tlacaxipehualiztli, Tozoztontli, Huei Tozoztli, niman ye Toxcatl: in ipan acoquizaya in Tlacatecolotl quinmictique in Cuizoyanohuaya, inic peuh Cuicoyanoliztli, zan quitlan in Moteuhzoma quilhui imalintzin tlaquemmocaquiti in Teotl ca otacico in ilhuiuh in Toteouh, ca axcan matlaquilhuitl, auh inin ca za oc toconquixtia ca tlemataizque ca zan tititotizque in iquac ye quitlecahuia tzohualli telicahuacazque in Mexica zan ye ixquich atleymaihuan.

Auh niman quito in Capítan ca ye qualli maquichihuazque ca onicac niman icompeuhque quimilochtito in occequíntin huallaca Caxtilteca, za yehuatl in Tonatiuh mocauhtia, ihuan occequintin auh in íquac oacico inin tlapohualpan niman yequitohua in Moteuhzoma tlaquicaquican in ahtzitzihuan ca izcatqui inquilhui in Teotl ± ca otacito in ilhiiuh in Toteouh cato con ilhuiquixtilizque niman quitoxicchihuacan auh in Moteuhzoma niman quimilhui in Mexica in Pipiltin in axcan quetonyexque.

Auh niman quitoque in Pipiltin tlaquinhualnotzati in tiachcahuan, auh in onyaque niman yequin nahuatia quimilhuia cenca ye ocyetoconana in yuh mochihuani. Auh quitoque in tiachcahuan ma zan chicahuac mana, níman quito inecahuintlacatecatl tlaxic mocaquitican in tlacatletixpancah, in yuh mochiuh chololan in zan quilcaltzacque Mexica in axcan ma no yuh techiuhtin ma ce centlapal chimalli totlapialmochihua.

Auh in oyuh quicac niman quito in Moteuhzoma cuixtoyaopan inticate mamotelchihua niman quito in Tlacatecatl ca ye qualli niman yeyepehua in cuicatl in teyacana telpochtequihua tenzacatl conaquia itocacatca tomahuacatl quauhtlazol in opeuh cuicatl.

± Auh iyehuantin Caxtilteca niman ye ic cece yacahualquiza tetlaquiquiza, niman = ye nahahuíntín on momamanato in quixohuayan, niman ic contlaco huite quito in teyacama ya ce tlacatl quiyacahuítec in ixiptla Diablo auh in tlatzotzonaya niman ic quimomamahuitequito ca ontetl inin huehueuh centetl caltempan quitzotzonaya niman yenequequezallo ye ixpoliohua. Auh niman ce tlacatl tlenamacac aca tliyacapan hualitzttia tzatzitihuitz quitotihuitz Mexicayé tleamayaocac íyolloquemati aquique inin mac mani malchimalli inin maquauh zanac xoyaquahuitl ínoquitaque Caxtilteca, niman ie motepotztia yuhqui za mototopeuhtiaque inic callacque niman ic on mocaltzacque. In ipan caltzactimanca. Etzaqualiztli cempohualtica, ínípan Etzaqualiztli ichtaca hualquiz in itlatol Moteuhzoma quimilhui in tiachcahuan.

Tlaquicaquican in Mexica ca ye omilhuitl in atle nicqua inin mazahuan Teteo ontlan in tolcuexotli quinqualtia, auh in axcan ye ontetl incomontihuetzi, ± auh inin maoc moxonexcaltican in tiachcahuan ma amotipoliuhti niman quitoque in tiachcahuan. Ca ye qualli niman ye monahuatia. Zan yohualtica in Callaquia mazatlaqualli. Auh niman hualla in Capitan inquineuepato occequintin Caxtilteca huallazquia yehuatl in Marquez Capitan iquac iyenochicomilhuitl ipan necalihuac, auh Tecuilhuitontli, in ipan yaque Tlaxcallan iquac inic in Moteuhzoma. 1520. Inin ipan in mochiuh ome tecpatl.

Auh in íquac omic Moteuhzoma niman quihualmamaltique itoca Apanecatl ompa quihuicac in huitzillan Zan ye ompa quihualtocaque ye noye ompa quihuicac inehcatitlan. Zan no quihualtocaque quihualmiminque, yeno ye ompa quihuicac in teopantzinco. Zan no quihualtocaque ye no ceppa quihuicac in acatl iyacapan quin ye ompacanque quito in Apanecatl Totecuiyohuamé motolinia in Moteuhzoma. Cuix nic mamatinemiz, niman quícoque in Pipiltin ± Xoconanacan niman quimontequiuhtique in Calpixque quitlatique in imacayo inin ipan in ome tecpatl mochiuh in omoteneuh inic quizque Tolteca acaloco Totoltepec mocehuito inic yaque Tlaxcallan ihuan inic macalximato Tetzcoco.

Auh niman Hueytecuilihuitl, Tlaxochimacayotl Huetzi Ochpaniztli, inipan motlatocatlalli in Cuitlahuatzin, Pachtontli, Hueypachtli, Quecholli, Tlami, inipan momiquili Cuitlahuatzin napohualilhuitl inon tlatocat Cuitlahuatzin totome inic momiquili.

Auh Panquetzaliztli, Atemoztli, Tititl, Itzcalli, in ipan motlatocatlalli in Quauhtemotzin.

1521. Ipan in ce Xiuhtlapohualli huehue xihuitl 3 Calli.

Auh in oyuh omotlatocatlalli Quauhtemotzin Tlacaxipehualiztli in ipan quimonpeuh Chalca, ihuan Xocotitlantlaca Tozoztontli in ypan micque Pipiltin Tzihuacpopoca Xoxopehualoc Tzihuactzin Tencuecuenotl Axayaca, totlehuicol, inic micque itencopa in Quauhtemoc in ± amantlan tlenamac quimilhui in tiachcahuan ye omilhuítl in otla hualcecemilhuítia in Tzihuacpopoca, ma itlanechayti, níman quítoque in tiachcahuan ma caquin moyollitla calhui in Tlacatl Tlacocolizcuitizque matiquincahuacan, mayauh niman ye momahuatia in tlamacazque noyehuatín in tiachcahuan in temictizque, niman yequin tetemohua in oquittaque mohuehuetztlan canato quilhuia oc xihuallao niccauhtze, niman oncan conhuihuitecque ihuan in izquíntin omoteneuhque.

Huey tozoztli, niman Toxcatl, Etzalqualiztli ipan in techpehualtique in Caxtilteca, inic techpeuhque Tecuilhuitontli, Hueytecuilhuitl, niman ye Micailhuitontli, ic napohualtomatiuh in axihuac Mexicayotl in Tenochcayotl, ipan in ei calli impehualloque Mexica Tenochca.

(Glyphes)

In yehuatl in Tlatohuani Quauhtemoctzin ipan mochiuh iyaoyotl, inic moyahuac Mexicayotl Tenochcayotl iquac in quincentlalique tlatoque acachinanco Quauhtemoctzin Tlacotzin, motelchiuhzin, oquitzin, ± nahuitzin in tzaqualoto in ilpitoca coyohuacan inic Xitlatilloque ihuan teohua, Quauhcohuatl, cohuaihuitl, Tecohuatzin, tetlanmecatl.

1522. 4 tochtli in ípan ompeohuac pantlan, ihuan Cuextlan, ihuan Michhuacan.

1523. 5 Acatl iquac qualoc Tonatiuh.

1524. 6 tecpatl in ipan maxitico Padresme San Francisco.