Information  TÚlÚcharger / Telecargar

▒ [fol. 1=] Injc ce amuxtli, vncan moteneoa, in teteuh: in qujnmoteutiaia, in njcan tlaca.  

Injc ce capitulo, yntechpa tlatoa, yn oc cenca tlapanauja teteuh: yn qujnmoteutiaia, yoan yn qujntlamanjliaia, yn ie vecauh.

 Vitzilubuchtli: šan maceoalli, šan tlacatl catca: naoalli, tetzaujtl, atlacacemelle, teixcuepanj: qujiocoianj in iaoiutl, iaotecanj, iaotlatoanj: ca itechpa mitoaia, tepan qujtlaša yn xiuhcoatl, in mamalhoaztli. q. n.

 iaoiutl, teuatl, tlachinolli. Auh yn jquac, ilhujqujxtiloia, malmjcoaia, tlaaltilmjcoaia: tealtiaia, yn pochteca. ▒

 Auh ynjc muchichioaia; xiuhtotonacoche catca, xiuhcoanaoale, xiuhtlalpile, matacaxe, tzitzile, oiuoalle.

 ▒

Injc vme capitulo, ytechpa tlatoa yn teutl yn itoca paynal: yn qujmoteutiaia, yoan in qujtlamanjliaia ie uecauh.

 Paynal: motepatillotianj, moteixiptlatianj: tepan mixeoanj: iehica ca qujmixiptlatiaia, in vitzilubuchtli [fol. 1v.ż], yn iquac tlaiaoaloaia, motocaiotia paynal: ipampa ca cenca, qujtototzaia, qujmotlalochtiaia. Auh in maceoalti, qujtocaia, qujtlalochtocaia, coiohujtiuja, qujcaoatztiuja, teuhtli qujquetztiuja, tlalli qujpototztiuja: iuhqujn tlaixqujqujša, tlalli tetecujca: auh ce tlacatl qujnapalotiuja. Auh ynjc muchichioaia, teuquemetiuja, quetzalapanecaiutl, in contlalitiuja, ixoacalichioale, ixcitlalichioale, mixcitlalichiuh, xiuhiacamioa, vitzitzilnaoale, eltezcaoa, xiuhchimale. ▒▒

   

Injc ey, capitulo, ytechpa tlatoa in teutl, yn itoca tezcatlipoca: in qujmoteutiaia, yoan in qujtlamanjliaia, ie uecauh.

 Tezcatlipoca: ynjn vel teutl ipan machoia, noujian ynemjian: mictlŃ, tlalticpac, ylhujcac. In iquac nemja tlalticpac, iehoatl qujiolitiaja, in teuhtli tlašolli: cococ teupouhquj, qujteittitiaia, tetzalŃ, tenepantla motecaia: ipampa y, mjtoaia: necoc iautl, muchi qujiocoiaia, qujtemoujaja, qujteecaujltiaia, qujtecujtiaia, yn ixqujch aqualli tepan muchioaia: teca maujltiaia, tequequeloaia. Auh in quenman, qujtemacaia, [fol. 2=] in necujltonolli: in tlatqujtl, in oqujchiotl, in tiacauhiutl, in tecujotl, in tlatocaiutl, in pillotl, in maujzšotl. ▒▒

   

Injc nauj capitulo, ytechpa tatoaia yn teutl, yn itoca tlaloc, tlamacazquj.

 Tlaloc, tlamacazquj: ynjn ipan machoia, in qujiaujtl: ca iehoatl qujiocoaia, qujtemoujaia, qujpixoaia, in qujiaujtl, yoan in teciujtl: qujxotlaltiaja, qujtzmolinaltiaja, qujxoxuvialtiaja, qujcueponaltiaja, qujzcaltiaja in quaujtl, in šacatl, in tonacaiotl. Yoan no itech tlamiloia, in teilaqujliztli, in tlaujtequjliztli. Auh ynjc muchichioaia, tlaixtlilpopotzalli, tlaixolhujlli, motlilošac, ixmichioave, ixmichioauhio, auachxicole, aiauhxicole, aztatzone, chalchiuhcozque, pošulcaque, notzitzile, aztapilpane. ▒▒

   

Injc macujlli capitulo, ytechpa tlatoa yn teutl, yn jtoca quetzalcoatl.

 Quetzalcoatl: yn ehecatl ynteiacancauh yntlachpancauh in tlaloque, [fol. 2v.ż] yn aoaque, yn qujqujiauhti. Auh yn iquac molhuja eheca, mitoa: teuhtli quaqualaca, ycoioca, tetecujca, tlatlaiooa, tlatlalpitza, tlatlatzinj, motlatlaueltia. Auh yujn yn muchichioaia: ocelocopile, mjxtlilpopotz, hecanechioale, mizqujnechioale, tzjcoliuhcanacoche, teucujtlaacuechcozque, quetzalcoxollamamale, ocelotzitzile, icpa omicicujje, hecacozcachimale, hecaujque, no pošulcaque. ▒▒

 

 Injc chicuacŰ capitulo: vncan moteneoa, yn oc cenca tlapanauja yn cioateteu: yn qujnmoteutiaia, in qujnteutlapiqujaia yn njcan tlaca.

 Cioacoatl tequanjj: yoan tetzaujtl, tetetzaujanj, icnoiutl qujteittitia: ca mjtoaia, victli mecapalli, qujtemacaia, ic temotlaia. Auh ynjc moteittitiaia, motenextiliaia: iuhqujn tecpan cioatl, nanacoche, iitznacoche, iztaian moquetza, iztaian actica iztacatla ycaia, iztazticac, vel panj qujquetza yn ij

neaxtlaoal, [fol. 3=] yn iaxtlacujl, ioaltica chocatinenca, tecoiouhtinenca, no iautetzaujtl catca. Auh yuj yn muchichioaia yxiptla yn jxaiac, centlaco chichiltic, centlaco tliltic, yuj quatzone, teucujtlanacoche, quechqueme, xiuhtzotzopace. ▒▒

   

Injc chicome capitulo: vncan moteneoa, yn cioateutl: yn itoca, chicome coatl.

 Chicome coatl: iehoatl ipan mjxeoaia, qujmjxiptlatiaia, in tonacaiotl: yoan in šašo tlein ynenca, yiolca maceoalli, yn joa, yn qualo. Auh yujn yn nechichioale catca; ixtlauhxaoale, amacale, axochiavipile, axochiacueie, no pošulcaque, tonalchimale, tonatiuhchimale. ▒▒

 

 Injc chicuei, capitulo: vncan moteneoa, yn cioateutl, yn jtoca: Teteu ynna: no motocaiotia Tlalli yiollo, yoan Toši.

 InnŃ catca yn teteu, qujmoteutiaja, in titici, in teitzmjnque, [fol. 3v.ż] tetzinanque, tetlanoqujlique, teixpatique. Auh yn cioa, temjxiujtique, tepillalilique, tetlatlaxilique, tlapouhque, atlan teittanj, tlaolchaiauhque, mecatlapouhque, tetlacujcujlique, tetlanocujlanque, teixocujlanque. No iehoantin qujtlatlauhtiaia, in temazcaleque; ypampa y, qujtlaliliaia yn ixiptla, in temazcalixquac, qujtocaiotiaia, temazcalteci. Auh yn jquac, in ie ilhujqujxtililoia, in ie imjqujztequjppa: in iehoantin titici, yn ixiptla catca teteu ynna, qujtlaoculpopoloaia, amo vel chocaia, queelelqujxtiaia, qujtlanenectiaia, qujtlanenequjltiaia, qujceceltiaia, ha qujchoctlanja, qujtlatlahtitiaia, momjquizquequeloaia; qujnecaliltiaia, qujiaochioaia, qujtlacaoachiliaia, coiuujaia, tlaujznextiloia, netlaujzmacoia, netlauhtiloia; inqujmiliuhca muchioaia in tiiacaoa, ic qujntišaujaia, ic qujnpotonjaia, qujmotzacujlitiuja, ic panj moquetzaia. ▒ Auh yn jquac onmjc, yn ixipta: [fol. 4=] njman ce tlacatl onmaqujaia, yn jeoaio, yn nepantla oalmoquetzaia, vmentin ycuexoŃ, qujujcaia, qujtzatzacutiujia: motišauique, motlotloujtecque, šan pepetlauhtiuj, in memecamaxtli: amacalli, in qujmama, mahmalacaquetzallo, ichcaxochiio, hiujquetzallo: vmpa concaoa, in tocititlan: quauhtlapechco contlaliaia, yn jeoaio. Auh ynjc nechichioale, motenolcopi, tlaxapuchtli qujmotlatlalili yn jcamapŃ ichcaxochioa, šoiatemale, cuechcueie, mocuechcueti: ic mitoa, citlalli ycue, citlalcueie, quavţvih, tzetzeliuhquj yn jujpil, quauhtzetzeliuhquj, iztac quavihujio, quauhteuitzšo; yn jchimal, teucujtla ytixapo, totoicxiio, popoa, jzqujce. ▒

   

Injc chicunauj, capitulo: vncan moteneoa, yn cioateutl, yn jtoca Tzaputlatena.

 Ce cioatl, ipan mjxeoaia, yn oxitl ynacaio muchioaia: quipaleuja yn tenacaio, yn aqujn quaxocociuj, tozcamjiaoaciuj, motozcaoxiuja: chaquachihuj, quašaoati, xotzaianj, tentzaianj, ixtetešonauj, [fol. 4v.ż] matetešonauj, icxitzatzaianj, yoan in qualo, in tlaxcaliciuj: yn jchiaoaca yn jtonal vel mieccan monequj. Auh yn iquac ilhujqujxtiloia, yn oxinamacaque, motlacacoujaia, tlacamjctiaia, qujtzooallotiaia yn jxiptla, qujcujcatiaia, yn iveveiooan, qujteponacilhujaia, caiotzotzonjlia, caioujtequjlia, caiacachilhuja, comjchicaoailhuja. Injc nechichioale: ome xaoale, amacale, olchachapanquj, tlaolchipinjlli yn jamacal, yoan quetzalmjiaoaio, aiuchicaoace. ▒ ▒

 

 Injc matlactli, capitulo: yntechpa tlatoa, yn cioateteu, cioapipilti.

 Diablome catca y, macujltin, teme yn imjxiptlaoan: intech tlamjloia, qujlmach tetlauelia, teca mocaiaoa, ynjc aca itech qujneoaia, tlauelilocati, tennecujliuj, ixnecujliuj, matzicoliuj, icxicopichauj, icximjmjquj, momacuecuetza, tenqualacquiša: ic mjtoaia omotenamicti, ypan oqujzque cioapipilti, vmaxac chaneque. Ipampa y [fol. 5=] yntetaoa, anošo tenaoa, qujmilhujaia yn jnpilhoan: maca xonqujša, tlalpan aci, temo in cioapipilti. Auh ypampa y, yn iquac ymjlhujuh, ynjc qujntlamanjliaia: tlamatzoalli, papalotlaxcalli, xonecujli, xocujchtlamatzoalli, izqujtl. Auh yn vncan momana y, in quenman vncan yn cioateucalco, in quenman, vmaxac. Auh yn injn nechichioal catca, mjxtišaujque: auh panj tlaolxoalti, tlaitzcopeoaltectli, tlaitzcopeoalli, yn jmamatlaquen, potoncacaqueque. ▒ ▒

 

 Injc matlactli vce capitulo: ytechpa tlatoa yn cioateutl, yn jtoca chalchiuhtli ycue: iehoatl yn atl.

 Teutl ipan machoia: iuhqujn cioatl qujxiptlatiaia, iuh mjtoaia, qujlmach ynvan pouj, in ueltiuh in tlaloque: ynjc mauiztililoia, ynjc imacaxoia, ynjc mauhcaittoia, ynjc tlamauhtiaia, teatoctiaia, teatlanmjctiai, [fol. 5v.ż] tepolactiaia, tepan pošonja, moteponašoa, maxiciotia, tepan moteujlacachoa, ynjc tecentlajiujca: yn acalli qujcuepa, qujxtlapachcuepa, queoatiquetza, ca acomaiauj, ca tema. Auh in quenma teapachoa, teapotzauja, mocueiotia, titicujca, xaxamacatimanj, cocomocatimanj, hatlacamanj: yn jquac oceuh, yn ie ceuj, aujc iaiauh: qujtoa maujltia, xixiqujpiliuj, cocomotzauj, atentli itech onmotlatlatzoa, onmochcachaquanja, mapopošoqujllotia. Auh yn jquac atle ehecatl, tlamattimanj, atezcattitimanj, petlantimanj, cuecueiocatimanj. Auh yn jquac ilhujqujxtiloia, šan no iquac yn etzalqualiztli: yn vncan ilhujqujxtililoia tlaloque, colotli in qujchichioaia yxiptla: qujcuetiaia, qujujpiltiaia, qujcozcatiaia, cozcapetlatl, itech pilcatiuh cuztic teucujtlacomalli: yoan qujtlamanjliaia, qujnanamiquj yn jtlenamacacauh, yiauhtli, ixpan qujtepevilia, ▒ caiochicaoaz [fol. 6=] ilhujtinemj, qujcujcatia in calpoleque, ycujcacaoan. Auh in vel ixiptla, iquac mjquja: tlacotli cioatl in qujcoaia, iehoan qujnextiaia, yn anamacaque: yn atl, yc motlaiecultia, yn acaltica atlacuj, yn acaleque, yn apantlaca: yoan acalquetzque tianquizco, in qujtechieltia atl. No iuh qujchichioaia, no iuh qujtlamamacaia, no iuh qujcencaoaia: iuh tlantiuja; yn miquja, ytocaiocan tlalocan: yn vncan inteupan, tlaloque, queltetequja. In jquac y, no cenca qujmaujztiliaia, yn motecušuma: ixpan tlenamacoia yn jxiptla, qujtlacotonjlia, iuh qujtoaia: qujiauhtlatlanj in tlacatl, qujtlamacehuja yn jmaceoal: yoan vncan mocnelilmati, ynjc qujmahujztiliaia atl; qujlnamiquja, ca ic tinemj, ca tonenca; yoan ic muchioa, yn ixqujch tetech monequj. No iuh qujmaujztiliaia, yn jxiptla tonacaiotl, yn jtoca chicome coatl: yoŃ yn j xiptla iztatl, ytoca Vixtocioatl: ic qujlnamjquja; yn ie tlamanjxti [fol. 6v.ż]: ca vel y nenca muchioa in maceoalli, ic vellamati, ic vel nemj. Auh yujn, in muchichioaia: moxaoaia, texotica, motenujltec, motexotenujltec, mixcošalhuj, chalchiuhcuzque, xiuhnacoche, texoamacale, quetzalmjiaoaio, atlacujlolhvipile, atlacujlolhuiujpile, atlacujlolcueie, atlacuešonanchimale, aiuchicaoaše, cacalaca; pošulcaque. ▒

 

 Injc matlactli vmome capitulo: ytechpa tlatoa yn tlašvlteutl.

 In tlašulteutl: yoan itoca ixcujna, yoan itoca tlaelquanj. Injc motocaiotia tlašulteutl, qujl ipampa, qujl iehoatl y iaxca, ytlatquj, ytech pouj, in teuhtli, in tlašulli: in qujtoznequj, avilnemjliztli, qujl ipan tecuti, ipan tlatocati yn aujlnemjlizšutl. Auh ynjc itoca, ixcujna: qujl navinti eoah, in cioa: ynjc ce ytoca tiacapan, ynjc vme, ytoca teicu, ynjc ey itoca tlaco: ynjc nauj itoca xocutzin. Injquehin, naujntin cioa; qujl teteu. Injquehin, ceceiaca yntoca: [fol. 7=] tlašulteteo. Auh ynjc motocaiotia tlahelquanj: qujl ipampa, imixpŃ mjtoa, imjxpan mopoa, yn jxqujch nequalli: iixpan mjtoa, momelaoa, yn jxqujch tlahellachioalli: immanel cenca temamauhti, immanel cenca oujh: atle mopinavizcaoa, vel muchi, iixpan neci, jxpan mjtoa. Neiolmelaualiztli. Qujlmach in tlašulli, in teuhtli, in aujlnemiliziotl: iehoatl qujtemaca, ic temotla, ic tehipitza in in tlašulteutl. Auh šan no iehoatl, qujtepolhuja: iehoatl chico, tlanaoac qujujca, qujteca: iehoatl, tepapaca, tehaltia: iehoatl imac manj immatlalatl, in toxpalatl. ▒ Auh injc qujtepopolhuja, ynjc chico, tlanaoac, qujujca, qujteca: iixpan neiolcujtilo, iixpan neiolmelaoalo, yn tlašulteutl, iixpŃ mopoa, mjhtoa, in tetlachioal. Auh iix, ynacaz, ytlacaccauh muchioa, in tlapouhquj, in tlamatinj, yn jmac manj, yn amuxtli, yn tlacujlolli: in qujpia yn tlilli, yn tlapalli, yn matile, yn piale, yn nonotzale, yn oqujto [fol. 7v.ż] yn mojolmelaoaz in tlapilchioale: achto qujtlacaqujtia, in tlapouhquj, qujlhuja. Ca ytechtzinco njnaxitiznequj, yn tlacatl, yn totecujo, yn tloque naoaque: yn totecujo, y ioalli, yn ehecatl, ytoptzin, ypetlacaltzin, njcnottitiliznequj. Qujlhuja yn tlapouhquj; otimotlacnelili: qujnaoatia, ynjqujn oallaz: qujpepena in tonalli, qujtta, yn jamux, yn jtlacujlol: qujtta, yniqujn qualli tonalli, yn ieccan, in qualcan: mjtoa, qujtonalpepenja. Auh yn ie yquac, in ie ynaoatilpan, iancujc petlatl quicoa: yoan copalli, yoan quaujtl; yn tlamauizti in tlamaceuhquj, šan ichan yn moiolmelaoa, ie vmpa iauh in tlapouhquj. Auh anoce teujc iauh in tlamaceuhquj: iancujc petlatl in moteca, vellachpano yn vncan motlalia, yoan tletlalilo: njman copalli contema in tleco in tlapouhquj, qujnotza in tletl: qujlhuja. Teteu ynnan, teteu inta, veueteutl, njcan oallatia in cujtlapilli, [fol. 8=] yn atlapalli, yn maceoalli: njcan chocatiujtz, tlaocuxtiujtz, moteupouhtiujtz, ancan omalauh, ancan omotepetlami, ancan oqujnamic yn vitlallotl, in tocatzaoalli, yn šacamitl; a qujiolitlacoa, ▒ qujtequjpachoa. Tlacatle, tTotecujoe, Tloquehe Naoaquehe, manošo xicmocujli, ma xicmocaqujti, yn inentlamachiliz yn maceoalli. Njman qujnotza, yn moiolmelauhquj, in iehoatl tlapouhquj: qujlhuja. Tioalmovicatia yujctzinco, iixpantzinco, in Tloque Naoaque; ticmolhujlico, ticmomaqujlico, yn miiaca, in mopalanca: ticmotlapolhujlico, in motop, im mopetlacal, a ma no ceppa ieh njcan timatoiauj, timotepexiuj: ma ixpantzinco ximopepetlaoa, ximomamaxauj, in Tloque, Naoaque, in Totecujo, in Ioalli, in Ehecatl. A cujx tictlacaittaz in Totecujo, a cujx mitztlacanotzaz: ca ioalli, ca ehecatl. Auh ynjn quentiujtz, ma xictlapo im motop, in mopetlacal: ma xicpoa in monemiliz, in motlachioal, yvin [fol. 8v.ż] quenjn ticmati, yvin quenjn cah: yn quenjn muchiuh, in quenjn tax: in quenjn ticchiuh, in monequal, in monequaujtec: xicnoquj, xicpetlanj, in maiectica, in maqualtica, in miiaca in mopalanca. Auh xicmotlaoculnonochili, yn Totecujo, in Tloque Naoaque, in momašoaltitica, y macochetica, in teputzetica; ximotlapalo, ma timopinoquetz, ma titzicolo. NjmŃ §tlalqua in tlamaceuhquj, oncopaltema: njman ixpan motlalia in tlapouhquj: qujlhuja, injc teviujti, ynjc tepatiloti, ynjc teixiptla. Totecujoe, Tloquehe, Naoaquehe: ca ticmocujlia, ca ticmocaqujtia, in njiaca, in nopalanca: mixpantzinco, njnopepetlaoa njnomamaxauja: ca onax, ca onjcchiuh: cujx ichtaca, cujx tlaiooaian, ca tezcac, ca tlavilpan im mixpantzinco, yn onax. Njman compeoaltia, in itlapilchioaliz, vel iujn quenjn cah, vel yujn quenjn qujchiuh: yn maca šan cujcatl, cenca šan ivin coneoa, cencan [fol. 9=] yvin conjtoa, yn iuh qujchiuh, im ma ca šan vtli, cencan qujtocatiuh yn itlachioal, yn iuhuj cencan qujtocatiuh. ▒ Auh yn otlamito yn itlatol, y no muchi qujto ytlachioal: qujnanqujlia, in tlapouhquj, yn ixtli, yn nacaztli muchioa, in teujujti, in tepatilloti: qujlhuja. O ca ticmononochilia, ca ticmomaqujlia, in Tloque Naoaque, im motlachioal, in monequavitec. Auh ynjn, ca izca yn taiz, yn ticchioaz: yn iquac temoa, yn iquac temo cioapipilti, anoše yn iquac ymilhujuh cioapipilti, yn ixcujname: naujlujtl timošaoaz, timocujtlaxculšaoaz, timotenoatzaz. Auh yn iquac vel ilhujtl, in ie oallatujh, in ioaltica tišacatlašaz, titlacoqujxtiz: ynjn motlapilchioal, iuh ticnamictiz y: auh ynjn iuh namique ez y: auh in quenjn ticnequjz, iuh ticnequjz: intla tišacatlašaz, iehoatl in teucalšacatl tiqujxtiz, anošo tlacotl. Auh ašo monacazco in titlaqujxtiz, anošo monenepilco. Auh [fol. 9v.ż] ynjc tiqujztiz: ca amo ma šan titlamašeoa, ca teuhtli, tlašulli in tictlaša, tictlacošoz, ticcujtlacueponjz yn monenepil, mixpampa ticaqujz, motzintlan in ticqujxtiz, in tictlašaz: ašo šan cecen in ticqujxtiz, anošo šan ticcenqujxtiz, tictlatlašalhujz, yn ašo centzontli, ašo vntzontli, in ticqujxtiz tlacotl: ic poliujz in motlatlacul, in motlapilchioal, im monequal. Auh intla šan xicca, yn itlapichioal, tlamaceuhquj: qujlhuja, timotenoatzaz, titlacatlaquaz, timocujtlaxculšaoaz, naujlhujtl: anošo qujlhuja titlatotiz, timoteteuhcaoaz, titepiqujz: anošo qujlhuja, ca nel vctli, yn ipan otitlanešomalti, tiqujnqujxtiz in totochtin. Auh qujlhuja, ynjc qujnaoatia: yn iquac tiaz, yn titlamaceoaz ioaltica, atle motech ▒ vetztiaz, tipetlauhtiaz: yn momaxac, amatl tlaitzcopeoalli in mantiaz: centetl micampa, motzintlampa, mantiaz. Auh yn iquac tioalmocuepaz, vmpa tocontlašaz yn imixpan totecujoan, yn teteu, ym mamacue [fol.10=]. Auh yn iquac otlamaceuh, njman oalauh yn ichan: ic cenmaian, monemilizcuepa: qujlmach intla occepa tlatlacoz, qujl ša aocmo tlaoculilonj. Qujlmach šan yio vey nequalli, vey nequaujtectli, in tetlaximaliztli: in qujtoaia veuetque. Injc moiolmelaoaia vevetque: qujlmach, iehoatl, ynjc amo tzacujltilozque, njcan tlalticpac, yn intlapilchioal: yntla otetlaxin ynjc amo quatetlaxililoz, ynjc amo quatepitzinjloz, ynjc amo quatetzotzonaloz, moiolmelaua. In tlapouhquj, yn ixpan tlalilo, tlapilchioalli: šan njman acan qujtoa, in tlein ixpan tlalilo, in tlein ilhujlo: ipampa ca amo ieh yn ilhujlo, in nonotzalo, ca Tloque, ca Naoaque, in maco, in ilhujlo, in tlapilchioalli: ca amo ieh motta, im maceoalli. ▒ ▒

 Injc matlactli vmey, capitulo: yntechpa tlatoa, yn tepitoton teteuh: yn qujntoqujlia, yn omoteneuhque, yn veueintin teteuh.

 [fol. 10v] Xiuhtecuhtli: Ixcošauhquj, yoan Cuešaltzin. Iehoatl motocaiotia in Tletl, anošo Veueteutl yoan Tota: teutl, ipan machoia: iehica, ca tetlatia, tepaloa, techichinoa, tlachinoa: yoan miec tlamantli, injc tlacnelia: ca ic nezcolo, ic tlapaoaxo, ic tlacuxitilo, ic tlaxco, ic iztatlatilo, ic necutlatilo, ic tecullatilo, ic tenextlatilo, ic tlatetzoionjlo, yc tlatzoionjlo, ic tlatleoatzalo, yc tetlecujlolo, ic temazcallatilo, ic oxitlatilo, ic tlanextlatilo. Auh yn iquac ilhujqujxtililoia, cexiuhtica: ipan itlamian yzcalli: qujxiptlatiaia in Motecušuma, ixpan tlacotonaloia, copaltemililo, oauhqujltamalli nechivililoia, in cecen calpan: achto ixpan qujmanjliaia in tletl, šatepan qualoia. Aun yn iveveiooan, iuh cemilhujtl, in qujcujcatia, qujteccizpichilia, qujteponacilhuja, ca iacachilhuja: auh aiac vel δ mašoaia in comalco, tetlacaoaltiloia. ynjc amo aca motlatiz, [fol. 11=] mochichinoz: ipampa in iancujcan oqualoc oauhqujltamalli, ynjc otlamanaloc. ▒ Auh in pipiltotonti, muchintin qujntlaxqujaia: yn aca coatl, cujiatl, xoujli, axolotl, tototl: in šašo tlein oc acic ioioli, ycamac contlašaia in tlecujlli; ic mitoaia, motlaxquja yn Tota. Auh yn oiooac, noujan tlatlaoanaia in vevetque, ylamatque: iuh qujtoaia, qujtlatoiaujliaia yn tletl, texcalceuja. Auh nauhxiuhtica, yn oc cenca, maujztililoia, ilhujuh: iquac motecujotiaia yn Motecušuma, ixpan yn iteucal, Xiuhtecutli, itocaiocan tzonmulco. Auh in iquac hy, vel muchi tlacatl, vel no ixqujch tlacatl, qujpaloaia, qujltequja, in vctli, in pipiltotonti: ic motocaiotiaia, pillaoano: yoan vncŃ qujntlatiaia, qujntlamahujtiaia in pipiltotonti. Ce cioatl, ce oqujchtli, in qujntemoaia pilhoaque, qujntlauhtiaia: tehoantin qujnmamatihuja, [fol. 11v.ż] vmpa qujmoncaoaia, yn iteupan Ixcošauhquj: vmpa qujnnacazxapotlaia, qujnnacazcoionaia: iuhqujn ic qujnmachiotiaia, ynjc qujmitta, yntlaoan ymaujoan: šatepan tlaqualo. In inechichioal catca: tliltica moteneujltec, chalchiuhtetele, xiuhtotoamacale, quetzalmiiaoaio mitzone, tlacotztzone, xiuhcoanacoche, amacozneapanale, no tzitzile, cocujole, xiuhtezcatlatlapanquj yn ichimal, tlachieltopile. ▒

   

Injc matlactli vnnavi capitulo: itechpa tlatoa in teutl yn itoca: Macujlxochitl yoan Xochipilli.

 ăan neneuhque, ynjc neteutiloia tecpantzinca inteuh: yn iquac nešaujliloia, intla aca toqujchti ipan cioacochiz, anošo [fol. 12=] cioatl, ipan oqujchcochiz: mitoaia, qujntlašulmictia, yn inešaoaliz, ic qujtemacaia, tetech qujtlaliaia, qujteilhujltiaia, qujtemaceoaltiaia, in xochiciujztli, yn menexoaliztli, tlapalanaltiliztli, quexiliujliztli, yujcpa nŕtoloa, nenetoltiloia, ynjc qujceujz, ynjc qujquanjz, ynjc qujcaxaoaz, cuculiztli. Auh yn iquac ilhujqujxtililoia, ipan xochilhujtl: achtopa navilhujtl nexochišaoalo: in cequjntin ic mošaoaia, chilcaoaia, qujn nepantla tonatiuh, in tlaquaia, centlaquaia, ioalnepantla qujmattiuh, tlacujlolatulli in qujia, xochitontli yn ipan ca, moxochišaoa: muchi qujqua in velic, šan no nepantla tonatiuh qujmattiuh. Auh yn aca, šan qujxcaviaia, in iotlaxcalli qujquaia, atle chilli: no nepantla tonatiuh qujmattiuh: yc tlamacujlti yn ilhujqujxtililoia, iquac ce tlacatl qujmixiptlatiaia, conmaqujaia yn itlatquj, ipan mitotiaia, qujtlatzotzonjliaia, qujcujcatiaia: yoan [fol. 12 v.ż] in ie nepantla tonatiuh, tlacotonaloia, nešuoaia, tlacoqujxtiloia yoŃ tlamanjliloia yn iteupan, ▒ macujltetl in qujchiujliaia, tamalli mitoaia tlacatlaqualli, cenca vevey, ipan ycatiuh xuchmitl: yn aca quauhcaxitl ynjc conmanjliaia, yoan contoqujliaia oc no macujltetl tamaltepitoton, mollotiuja; yoan vntetl tzoalli y iol poujia, no cecnj quauhcaxtica, mantivia, centetl tliltic, centetl tlatlauhquj. Auh yn aca izqujtl anošo necuzqujtl, anošo xonecujlli, papalotlaxcalli, iotlaxcalli, tzoallaxcalli, tzoalchimalli, tzoalmitl, tzoalmaquaujtl, tzoalnenetl: yoan noujan oalcaoaloia, in mamalti njcan Mexico, moteneoa maltequjme, yn ixqujch techiaoalotoc, yn iautenoaque, yn iaotenco onoque qujnoalcaoaia yn inmalhoan, yn intlaaxioan, inmaltequjhoan, muchioaia: njcan qujnpiaia, yn calpixque, in cacalpixque. [fol. 13=] Auh intla aca tlaielti, intla tlachololti, ypan tlacaquetzaia, motlacacoujaia, qujxiptlaiotiaia, qujxiptlatiaia: in tlatlacuti, vncan miqujia, yn iquac ilhujqujxtililoia. Auh yn inechichioal: tenmacpale, ixtlapaloatzale, tlaixtlapaloatzalujlli, tlaixtlapalhvilli, yhujtzoncale, quachichiqujle, vitonquj yn itlamamal, vitonca tlamamale, ypan icac, tonalopanjtl, quetzaltzonjo, quetzaltzontecomaio, quetzaltzontecome, quetzaltzonteconjo, tentlapaltica motzinjlpi, motzinapa, ytonalocac, tonalocaque. ▒

.................. .................... ...........

 

haut