Fermer / Cerrar / Close Informations Informaciones Télécharger / Telecargar

=053 (fol. 75) In nican ca tlamachilliz tlatol zazanilli yehuecauh mochiuh inic mamacatlalli cecentetl initlamamaca inic peuh izan yuh macho iniquintzintic inizquitetl in omacatonatiuh {inoma ca atonatiuh} he chiquacentzon xihuitl ipan macuilpohual xihuitl ipan matlacxihuitl omei, axcan ° ipan Mayo, ic 22 ilhuitica de 1558 años. Inin tonatiuh nahui ocelotl catca, 676 años, inique in izcepanonoca o cello qualloque ipan nahui ocellotl intonatiuh, auh in quiquaya chicome malinalli initonacayouhcatca, ° auh inic nenque centzonxihuitl ipan matlacpohualxihuitl ipan yepohual xihuitl, ipan ye no caxtolxihuitl ace, auh inic tequan qualloque matlac xihuitl ipan yexihuitl inic popoliuhque inic tlamito, auh iquac polliuh in tonatiuh, auh inin xiuhcatca Ce Acatl : Auh inic peuhque in qualloque in cemilhuitonalli Nahui Ocellotl, zan no ye inic tlamito inic popoliuhque.

Inin tonatiuh nauhuecatl itoca iniquein inic oppa onoca, yecatocoque, ipan nahuecatl in tonatiuh catca, auh inic poliuhque yecatocoque Ozomatin mocuepque ° in incal in inquauh moch ecatococ, auh inin tonatiuh, zan no yecatococ, auh in quiquaya matlactlomome cohuatl inin tonacayouh catca, auh inic nenca caxtolpohualxihuitl ipan yepohual xihuitl yeno ipan nahuixihuitl inic popolliuhque, zan cemilhuitl ¾053 in ecatocoque nauh ecatl, ipan cemilhuitonalli, inic polliuhque, auh inin xiuhcatca ce tecpatl.

Inin tonatiuh nahui quiyahuitl, inic ei inic etlamantli nenca nahui quiyahuitl intonatiuh ipan, auh inic polliuhque tlequiahuilloque Totolme mocuepque, auh no tlatlac in tonatiuh moch tlatlac inincal, auh inic nenca caxtolpohual xihuitl ipan matlacxihuitl omome, auh inic popolliuhque za cemilhuitl in tlequiyauh, ° auh in quiquaya chicome tecpatl inintonacayouh catca, auh inin xiuh ce tecpatl, auh icemilhuitonalli nahui quiahuitl inic polliuhque /{popoliuhque}/ pipiltin catca yeica in axcan ic monotza cocone pipilpipil.

Inin tonatiuh nahui Atl itoca, auh inic manca atl ompohualxihuitl on matlactli omome, iniquei inic nauhtlamanti nenca ipan nahui atl in tonatiuh catca, auh inic nenca centzon xihuitl, ipan matlacpohualxihuitl ipan epohual xihuitl yeno ipan caxtolxihuitl oce, ° auh inic popoliuhque apachiuhque ±120 mocuepque mimichtin, hualpachiuh in ilhuicatl za cemilhuitl in polliuhque, auh in quiquaya nahui xochitl inin tonacayouh catca, auh inin xiuhcatca Ce Calli, auh icemilhuitonalli nahui atl inic polliuhque, moch polliuh in tepetl, auh inic manca Atl ompohualxihuitl on matlactli omome. Auh inic tzonquiza inin xiuh ° nimaye quinahuatia in titlahuan in tocanata, auh inic cihuauh itoca nene, quimilhui macaoctle xictlazotlaca xiccoyo nican in cenca huei in ahuehuetl, auh ompa oncallaquizque iniquac in Tozoztli in huahual pachihuiz inilhuicatl, auh oncan callacque niman ye quin pepechoa, quimilhui, zan centetl inticcuaz in tlaolli no centetl in mocihuauh, auh in oquitlamique oxalquizque onca coyehuactiuh in atl aocmo molinia in quahuitl niman ye motlapoa, (fol. 76) niman ye quitta in michin, niman ye tlequauhtlaza, auh niman ye quimoxquia in mimichtin, niman ye huallachia in teteo in Citlallinicue in Citlallatonac quitoque teteoye. Aquin ye tlatlatia, aquin ye qui pochehua in ilhuicatl, ° auh niman ic hualtemoc in Titlacahuan in Tezcatlipoca, niman ye quimahua quilhui tletai tataye tleamai niman quimonquequechcoton =054 in tzintlan, quimontlatlalili inin tzontecon ic chime mocuepque. Auh inic pocheuh in ilhuicatl ome acatl xihuitl, izcatqui iye tehuantin inic ye tonoque, inic huetzin tlequahuitl, inic moman in ilhuicatl ce tochtli xihuitl. Izcatqui inihuetz tlequahuitl icuac nez in tletl, ° auh inic tlayohuati manca cempohual xihuitl ipan macuilxihuitl.

Auh inic moman in ilhuicatl ce tochtli xihuitl, auh in omoman, auh niman ye quipochehua in chichime inyuh omito in nipa auh ca zatepan in huetz in tlequahuitl in tlequauhtlaz in Tezcatlipoca inyenocepa ic qui pocheuh in ilhuicatl ipan xihuitl ome acatl, auh niman ye mononotza in teteo quitoque aqui in onoz caomoman in ilhuicatl caomoman in tlalteuctli aqui onoz Teteoye ye nentlamati in Citlalli icue in Citlallatonac in Apanteuctli, Tepanquizqui, tlallamanque, huictlollinqui Quetzalcohuatl, Titlacahuan, ° auh niman yeyauh in Quetzalcohuatl in Mictlan itech acito in Mictlanteuctli, in Mictlancihuatl niman quilhuica yehuatl ic nihualla in chalchiuh omitl in ticmopiellia can ic cuico, auh niman quilhui, tletic chihuaz Quetzalcohuatle, auh ye no cepa quilhui ca yehuatl ic nentlamati in teteo aquin onoz in tlalticpac, auh yenocepa quito in Mictlanteuctli ca ye qualli tlaxoconpitza in notecciz, auh nauhpa xic tlayahualochti in nochalchiuh teyahualco, auh amomaco yonqui initecciz, niman ye quin notza in Ocuilme qui cocoyonique nima yeicompa callaqui in xicoti in pipiolme nima yequipitza quihualcac in Mictlanteuctli. ° Auh ye no cepa quilhuia in Mictlanteuctli ca ye qualli xoconcui, auh nima ye quimilhuia inititlahuan in Mictlanteuctli in micteca xocomilhuitin teteoe zan quicahuaquiuh, auh in Quetzalcohuatl niman quihuallito ca moca yeic cen nic itqui, auh niman quilhuia ininahual, za xiquimonilhui zan niccahuaquiuh, niman quihualilhui inqui tzatzilitiuh ca zan niccahuaquiuh, auh icuel on tlecoc, niman yeic concui in chalchiuhomitl cecni temi in oquichtli iniyomio no cecni temi in cihuatl iyomio, niman ic concuic, niman yeicqui quimilloa in Quetzalcohuatl, niman yeic quitquitz. ° ±121 Auh ye no cepa quimilhui in Mictlanteuctli in ititlahuan teteoye ¾054 ye nelli quitqui in Quetzalcohuatl in Chalchiuhomitl teteoye xiquallalilitin tlaxapochtli, niman contlallilito inic oncan motlaxapochui motlahuitec, ihuan qui mauhtique zozoltin Mictihuetz, auh in Chalchiuh omitl niman icqui cen mautihuetz, niman quiquaquaque in zozoltin quiteteitzque, ° auh niman ic hualmozcalli in Quetzalcohuatl, niman ye ic choca niman, ye quilhuia ininahual, nonahualeque yezi ? Auh niman ye quilhuia quenin yez canel otlatlacauh mazonel yuhqui yauh, auh niman ye connechicoa conpepen conquimillo, niman ic quitquic in tamoanchan, auh inoc onaxiti niman ye quiteci itoca Quilachtli yehuatl iz cihuacohuatl, ° niman ye ic quitema in chalchiuhapazco, auh niman ye ipan motepolizo in Quetzalcohuatl, niman mochintin tlamacehua in teteo in nipa omoteneuhque in Apanteuctli in huictlollinqui, Tepanquizqui (fol. 77) tlallamanac, Tzontemoc, Techicuaceca in Quetzalcohuatl, ° auh niman quitoque otlacatque in teteo in macehualtin ye ica in otopan tlamaceuhque, ye no cepa quitoque tlein quicuazque teteoye ? Ye tlatemohua in tonacayotl, auh niman quicuito in azcatl in tlaolli in itic tonacatepetl, auh nimaye quinamiqui in azcatl in Quetzalcohuatl quilhui : can oticcuito xinechilhui, auh amo quilhuiznequi ; cenca quitequitlatlania, niman ic quilhuia, ca nechca, niman ye quihuica, auh niman ic tlilazcatl mocuep in Quetzalcohuatl niman ye quihuica niman ye ic calaqui, niman yeic quizaza canehuan in tlatlauhqui azcatl in machequihuicac in Quetzalcohuatl ° tlatempan quihuallalalia in tlaolli niman ye quitqui in tamoanchan, auh niman ye quicuacua in teteo, niman ye ic totenco quitlalia inic tihuapahuaque, auh niman ye quitohua quentic chihuazque in Tonacatepetl, auh niman zan ya quimanaznequi in Quetzalcohuatl quimecayoti, auh amo queuh, auh niman ye quitlapohuia in Oxomoco, auh niman no ye quitonalpohuia in Cipactonal inicihuauh Oxomoco ca cihuatl in cipactonal ca zan quihuitequiz in Nanahuatl in tonacatepetl, ca oquitlapohuique, auh nimaye netlalhuilo in tlaloque in xoxouhqui tlaloque iztac tlaloque cozauhquitlaloque tlatlauhquitlaloque, ° niman ye quilhui tequi in nanahuatl, auh niman ye namoyello =055 in Tlalloque in tonacayotl in iztac in yahuitl, in coztic, in xiuhtoctli, in etl in huauhtli in chian in michihuauhtli, ixquich namoyaloc in tonacayotl.

...................

Haut