Information  Tlcharger / Telecargar

[f. 1r.=]

HVEHVETLAHTOLLI. PLATICA QVE HAZE EL PADRE al hijo auisandole, amonestandole que sea bueno.

Tenonotzaliztli in tetta yc quinonotza yc quizcalia in ipiltzin, inic qualli yectli yc monemitiz.

Nopiltz, nocozqu, noquetzal otiyol otitlacat, otimotlalticpacq^xtico in ītlalticpactzīco in Totecuiyo omītzmoyocolili, omitzmopiquili, omitzmotlacatilili in ipalnemohuani Dios. Auh mixco mocpac otitlachixque in timonanhuā in timottahuan, yhuan immahuihuan, immotlahuan, immohuayolque, omixco mocpac tlaxichque, ochocaque, otlaocoxque mopampatzinco; ynic otiyol inic otitlacat in tlalticpac. Auh in axcan achiztzinca otihuallachix, otihuallmozcali, otihualizcallohuac, otihualchamahuac, yuhq^mtia titototzintli quin ye timotlachopinilia ihquin atimā otizcallohuac, otimozca

[f. 1v.]

ti, otimohuapauh, yuhquimma quin ye tihualquia immocacallotzinco, yuhquimma quin ye timotlaoquentia, yuhquimma quinyequia immocuitlapiltzin immatlapaltzin, yuhquimma quenteltzin ticoolonia immomatzin mocxitzin, immotzontecontzin yuhquimma q^n ye timoyeyecohuan inic tipapatlantinemiz. Auh quen cōmonequiltia in ipalnemohuani ao emilhuitl ac omilhuitl timitztotlanehuizq^ ticozcatlanehuizq^ tiq^tzallanehuizq^ ipaltzīco in Totecuiyo, ao tihcaz ao tinemiz ī tlalticpac, ma oc ihuiyā ma oc yemel inxihualmana, in xihualmozcalti. Ma ilihuiztehua ma ilihuiztia, ma oc ye itloctzinco inahuactzīco ximocalaqui in Totecuiyo inic mitzmotlaocoliliz. Auh ma oc yehuatzin quimomachitia, ma oc yehuatzī mitzmoyeyecalhui mitzmotamachihuili, ca teutl ca Tlahtohuani, ca huey macoche mamalhuace, ca huey tepotze, ca yehuatzī Dios huel monantzin mottatzin in cenca tlapanahuiya inic huel mitzmocuitlah

[f. 2r.=]

tzīnohua inic mitzmotlaotilia, in ahmo mach yuhqui inic nimitznotlaotilia in nehuatl in nimonan nimotta: yehica ca yehuatzin oquimihtalhui oquimoyocolili oquimoyecalhui inic otiyol, inic otitlacat. Ma ticmolcahuili in emilhuitl in ce yohual xicmonochilitinemi, xicmotlatlauhtilitinemi, xelciciuhtinemi, xitlaocoxtinemi. Macamo ihuiyan in cochiztli in netequiztli in xicmochihuili, ma ontlami immixtzī immoyollotzin in itechpatzinco in Totecuiyo, yehica camottatzin, ca omitzmochihuilli, ma ipampa in itetlaotlalitzin xicmotlaotlayecoltili inic mitzmocneliliz, inic tlacahuaz in yollotzin inic mitzmomaquilia in itenemactzin immolhuil immomahcehual, immihcaya, immonenca, inic huel tihcaz inic huel tinemiz, inic ahmo mixtitlan tlayohualtitlan ticalactinemiz.

2 Yhuan in canin ixpan tiquiaz in ixiptlatzin in Totecuiyo, ahnoo itlaohuan, ahnoo Cruz huel ticmahuiztiliz ix

[f. 2v.]

pan timopachoz ahnoo timotlanquacoloz. Auh intla huel yehuatl in Totecuiyo Iesu xpo in inacayotzin (in iihtic moyetztica in Sancto Sacramēto) ixpātzinco tiq^az, tlapanahuiya inic ticmotlatlauhtiliz in ica muchi moyollo, ca moteouh ca motema quixticatzin, ca motlaottatzī in ihtic moyetztica in Sācto Sacramento. Yhuan huel ticmahuiztiliz in itocatzin in Totecuiyo Iesu Christo, yhuā in ihuitzin huel ipan timocencahuaz.

3 Yhuā tiquintlahpaloz in itlachihual in campa cate, in ahnoo cana tiquinnamiquiz in pipiltzin in tlahtoque, yhuan in tepan ihcanime, in teoyotica teyacanque in tepachohuanime in Padreme: auh in huehuentzin in ilamatzin, yhuan in ycnotlacatl, in nentlacatl, in ahmo ahuiya in ahmo paqui, yehuatl inic ciauhquetzalo, inic tiquinciauhquetzaz, ahmo an ilihuiz in tiquinciauhquetzaz, huel qualli tlahtoltica, ahmo yuhquin tinōtli yc tinemiz, intla huel ticchihuaz, yc titlacamachoz ti

[f. 3r.=]

yectenehualoz, yc tiqualihtoloz.

4 Yhuan xicmotlaotili xicmocnelilmachiti, xiquixtili xiquimacaci, xicmauhcaitta, xictlacamati, xicchihuili in tleyn quinequi in iyollo in nantli in tatli, ca ilhuil, ca imahcehual, ca inemac ca itech pouhqui in tetlayecoltiliztli. Ca ahmo huel yc ihcaz, ahmo huel yc nemiz in aquin ahmo quitlacamatiz in ahmo quimahuiztiliznequiz in inan in itta, in an ixco, in an ycpac nemi, cayehuatl tocayotiloz ycnopillahueliloc. Yequene ma ilihuiz tinen, ma ilihuiz tichocholotinen, ma ilihuiz taactinen in teixpan in tenahuac, an ihuiyan an icemel ximonemiti, ca ye qualli ca ye yectli ximocnoteca, xicmopechteca, xitolo ximomalcocho.

5 Yhuan huel xitenotza, huel xitetlatlauhti xiteixtili, xiteymacaci, xitetlacamati, xitetlaotla, yehica yc tinemiz, yc tihcaz. Mayehuatl yohui ixopech tictoca in yc

[f. 3v.]

................................

 

haut